«Առա՛ջ, Հայաստա՛ն» կամ «Արթնացի՛ր, Հայաստա՛ն»

Երեկ գիշեր կեսգիշերից բավական անց փողոցից բարձր ձայներ լսեցի, մի քիչ լարեցի լսողությունս ու շատ ծանոթ արտահայտություն հասավ ականջիս. «Առա՛ջ, Հայաստա՜ն»… Եթե չպարզեի, թե ինչ է, քունս չէր տանի…

Մի խոսքով, պատուհանից նայեցի ու տեսա մի քանի հարբած տղաների, ովքեր ուս-ուսի տված քայլում էին դատարկ փողոցով ու բղավում, մեկ-մեկ էլ երգում We are the champions՝ Այսինքն՝ հաղթել ենք… Ինձ նույնիսկ թվաց, թե արտասահմանցիներ են, տեղացիների էնքան էլ նման չէին։

Դե, մարդկանց դուր է եկել արտահայտությունը, գոռում են։Եթե երգն էլ թարգմանած գոռային՝ ՀԱՂԹԵԼ ԵՆՔ, ընդդիմադիրներն էլ գոհ կմնային։

Մենակ թե՝ Ամիրյանի ու Զաքյանի բնակիչները, ինչքան էլ քաղաքականացված լինեն, այդ ժամին հաստատ կուզեին քնել։ ՝

Բժիշկները զգուշացնում են. Երեւանի կենտրոնում վազելը վնաս է առողջությանը

Բախտի բերմամբ, մի քանի ամիս է՝ ապրում եմ Երեւանի կենտրոնում։Ձմռան նստակյաց, չաղացնող ու ծանրացնող ամիսներից հետո՝ գարնանը գոնե ուզում ես մի քիչ շարժվել, շատ քայլել, անցնել քո սիրած քաղաքի սիրած փողոցներով։Բայց դրա համար առնվազն պիտի օդերեւութաբաններից ճշտես քամու ուղղությունն ու արագությունը, հետո էլ քաղաքապետարանից պարզես, թե Երեւանի որ հատվածներում ինչ մասշտաբի շինարարություն է։